|
Менаџерката на Проески ни откри дека Руслана на концертот „Те сакаме сите, Тоше“ ќе ја пее песната со која тој настапи на Евровизија во Истанбул во 2004 година
Руслана и Тоше се запозна на Евровизија во Турција и веднаш развија топло пријателство
Украинската евровизиска победничка Руслана, на големиот концерт наречен „Те сакаме сите, Тоше“, што на 5 октомври на Градскиот стадион во Скопје ќе се одржи во чест на Тоше Проески, ќе ја пее песната „Лајф“, со која Тоше ја претставуваше Македонија на Евросонг во Турција во 2004 година. Специјални гости ќе бидат соработниците и авторите со кои Тоше го работеше англискиот албум. Тие ќе соопштат дека на 25 јануари - роденденот на Тоше, на пазарот ќе се појави долгоочекуваниот албум на англиски јазик, а премиерно на публиката ќе и' подарат уште еден необјавен сингл како негова најава. Овие две информации ни ги потврди менаџерката на Проески, Лилјана Петровиќ.
НАСТАП НА ВИСТИНСКИТЕ ПРИЈАТЕЛИ
Петровиќ вели дека сите учесници на концертот се луѓе на кои Тоше нешто им ветил, со кои соработувал и планирал најразлични проекти.
- Сите пејачи што ќе настапат на овој концерт се драги луѓе на Тоше, кои го сакаа и ја почитуваа неговата работа. Со дел од нив Тоше планираше да прави најразлични проекти и хуманитарни дела, но не успеа да ги реализира. Ќе го наведам примерот на пејачката Нина Бадриќ, со која за ноември и декември 2007 година имаа договорено 10 заеднички концерти. Со хуманитарецот, пејач и новинар Иван Плавшиќ, кој е дел од фондацијата на принцезата „Катарина Караѓорѓевиќ“, исто така планираа многу хуманитарни акции и затоа и тој ќе биде дел од настанот. Тоше на секој концерт велеше „Ве сакам сите“ и затоа овој ќе се одржи под мотото „Те сакаме сите, Тоше“, како наш одговор на неговите пораки - вели Петровиќ. Од Македонија, гости на концертот ќе бидат Калиопи, „Синтезис“, Наум Петревски - кој ќе ја пее омилената композиција на Тоше „Има ли песна“ и Симон Трпчевски - кој на пијано ќе ја свири „Љубена“, нумера што ја напиша за Проески, а тој не забораваше да му се заблагодари за тоа на ниту еден концерт.
КОНЦЕРТОТ ЌЕ ПРЕРАСНЕ ВО ТРАДИЦИЈА
Освен Руслана, со која Тоше се запозна во Турција и со неа разви топло пријателство, на концертот ќе гостуваат повеќе ѕвезди од балканската музичка сцена. Од Хрватска ќе дојдат Тони Цетински и Нина Бадриќ, од Словенија Аленка Готар, а од Србија Леонтина Вукомановиќ, која ќе ја пее „Чија си“, Жељко Самарџиќ, кој ќе ја исполни „Цреша“, Билја Крстиќ, која ќе се претстави со „Јовано Јованке“ и Гоца Тржан, а ќе настапи и црногорскиот изведувач Бојан Маровиќ. Повеќе од 20 пејачи околу три часа ќе ги пеат песните на Тоше.
- Своето присуство го потврдија и Енди Рајт, Вејн Хектор и Брајан Тејлор од „Пипл ин моушн“, кои ќе дојдат за да го објават датумот на излегувањето на англискиот албум на Тоше. Тоа ќе биде 25 јануари - денот на неговиот роденден, ден кој на сите нас посебно ни значи - вели Петровиќ.Концертот ќе го пренесуваат седум телевизии од повеќе земји, меѓу кои и Бугарија и Албанија. Македонската телевизија ќе врши директен пренос, а преку Сателитскиот канал атмосферата од концертот ќе му биде достапна на целиот свет.
- На сцената, пејачите ќе ги придржува симфониски оркестар, како и бендот на Тоше. Ова е само првиот од низата концерти што секоја година на овој датум ќе се одржуваат на Градскиот стадион во чест на Тоше, дента кога пред една година го одржа својот последен концерт на оваа локација - ни изјави Петровиќ.
Манифестација со хуманитарна нишка
Тоше Проески беше голем хуманитарец и им помагаше на многу луѓе, а организаторите на концертот не заборавија да му дадат и хуманитарна нишка на концертот што во негова чест ќе се одржи на Градскиот стадион во Скопје. На сите телевизии што ќе го пренесуваат ќе се појават телефонски броеви на кои граѓаните ќе можат да донираат средства за фондацијата „Тоше Проески“, која потоа ќе ги пренамени за хуманитарни цели. Последниот концерт што Тоше го одржа на Градски стадион, исто така беше хуманитарен. Под мотото „Образованието е одговорност на сите“, Тоше пееше во името на сите ученици од нашата земја и за нив собра околу 150.000 долари
|
