|
Градскиот стадион во Скопје никогаш не бил толку полн, а толку празен како на завчеравечер одржаниот концерт во спомен на Тоше Проески. Публиката, која со години и беше верна на најголемата македонска ѕвезда, повторно ги наполни трибините како пред една година. Солзите беа јазик за болката, се беше болно и тажно без момчето со ангелски глас, но сите што го сакаа дојдоа да ја продолжат неговата хумана мисија. Грандиозниот музички спектакл "Сите те сакаме, Тоше", во чест на легендарниот македонски музичар Тоше Проески, стартуваше со снимката од еден поранешен концерт на Тоше, на кој ја испеа традиционалната "Зајди, зајди".
Тони Михајловски и Ели Танаскова го водеа овој голем хуманитарен концерт, на кој во спомен на нашата музичка легенда настапија над дваесет пејачи од Балканот, па и пошироко.
"Вечерва најсреќен ќе бев да можам да го најавам токму него, но тука се неговите пријатели кои ќе пеат, а тој ќе го чуе нашиот крик", рече Тони, најавувајќи ги пејачите кои ги пееја песните на Тоше и уште еднаш успеа да не обедини сите околу неговата песна.
Сите пееја за него и плачеа по него, солзите беа главните придружнички додека колегите на Тоше ги пееја неговите песни, а на големите видеобимови се вртеа неговите фотографии и снимки. Публиката направи ѕвездено небо со мобилните телефони, викаше "Тоше, Тоше...", како да очекуваше и тој да се појави однекаде, да им се насмее и да им каже колку ги сака. На сцената прв се искачи Наум Петрески, кој ја испеа својата "Има ли песна", една од омилените композиции на Тоше.
Синтезис потоа продолжија со народната "Ој, девојче", додека Биља Крстиќ и Бистрик ја исполнија "Јовано, Јованке".
Пијанистот Симон Трпчески прво ја запеа "Љубена", која ја компонираше специјално за Тоше, а потоа на клавирот го отсвири инструменталот, додека публиката пееше. Оперскиот пејач Игор Дурловски настапи со прекрасната балада "Го лажам секој нов рефрен", а Гоца Тржан сама ја испеа дуетската "Илјада и двеста милји".
Бојан Маровиќ ја пееше емотивната "Полско цвеќе", Нина Бадриќ настапи со "Несаница", а Тони Цетински имаше чест да ја пее "Тајно моја".
Санди Ценов ја пееше "Једина", а Марија Шестиќ со темата "Овој свет". Адријан Гаџа ја отпеа "Никој како тебе не бакнува", а од грлото на Маја Татиќ се чу песната "Има ли ден за нас".
Виталиј Козловски настапи со хитот "Срце није камен", а Иван Плавшиќ со "Соба за тага". Тој во името на хуманитарна организација на кралското семејство Караѓорѓевиќ и на РТС постхумно му врачи на Тоше плакета за својата хуманитарна работа. Авторката на неговиот хит за Беовизија "Чија си" - Леонтина, настапи со истата композиција, а Жељко Самарџиќ ја пееше омилената песна на Тоше "Још и данас замирише трешња". Калиопи во чест на својот голем пријател ја отпеа баладата "Немаш ни благодарам". Аки Рахимовски ја испеа "Јесен у мени", Ањеза Шахини, со која Тоше се дружеше на Евросонг во Истанбул, настапи со "I Will Always Love You", а евровизиската победничка Руслана ја пееше "Life".
Аленка Готар од Словенија, која, како и сите учесници на концертот порача: "Те сакаме сите, Тоше, ја исполни Арија, која нашата легенда ја отпеа во дует со италијанската пејачка Џана Нанини.
И на крајот од концертот полн со емоции, песни и солзи беше премиерно презентиран дуетот на Тоше со внукот Кристијан и темата "My Litlle".
Со "Игри без граници", судбинската песна на Тоше, која ја отпеа сите учесници, заврши најтажниот концерт во македонската историја. Сите пејачи настапија во придружба на Оркестарот на Македонската опера и балет со диригентот Саша Николовски - Ѓумар, како и со бендот на Тоше, неговиот придружник на сите концерти. Со песната и безрезервната хуманост си ја обезбеди вечноста, а нам ни ги оставни неговите песни да шират љубов, хуманост и добри вибрации меѓу нас.
СТАТУЕТКИ СО ЛИКОТ НА ТОШЕ
Меѓународната фондација Тоше Проески на учесниците на концертот им додели статуетки со ликот на Тоше, а првата му беше врачена на премиерот на Република Македонија, Никола Груевски, кој на почетокот на овој настан одржа поздравен говор. Според податоците од организаторот Меѓународната фондација Тоше Проески, беа продадени 45.000 влезници, чиј приход ќе оди во добротворни цели.
Светскиот продуцент Енди Рајт го донесе англиското ЦД
На концертот од Лондон допатува и Енди Рајт, музичкиот продуцент на Тоше за неговиот албум на англиски. Дојде да ја исполни неговата желба де се види дуетот со неговиот внук Кристијан, а го донесе и англиското ЦД кое треба да излезе на 25 јануари, на денот на неговиот роденден, а на кое има четири авторски песни на Тоше.
КОНЦЕРТОТ ДИРЕКТНО ГО ПРЕНЕСУВАА НАД 20 ЗЕМЈИ
Музичкиот спектакл директно го пренесуваа над 20 земји. За време на концертот, преку он лајн мост, директно на Градскиот стадион се вклучија телевизии од Србија, Хрватска, Босна и Херцеговина и Бугарија, како и со тажното Крушево. Спектаклот, освен 50-илјадната публика на Градски стадион во Скопје го следеа и неколку десетици милиони ТВ-гледачи во Европа и светот. Покровител на концертот беше Владата на Република Македонија и Министерството за култура, а организатор Меѓународната фондација Тоше Проески - Крушево.
|
