|
Дебитантот Влатко Лозановски од Кичево е победник на 23 издание на фестивалот на музика "Макфест 2008", што заврши завчера вечерта во Штип. Второ место им припадна исто така на дебитантите, близнаците од "Некст тајм", додека третото место го освои дуетот Дани и Влатко.
-Пресреќен сум што победив иако искрено не се надевав. На фестивалот има силна конкуренција, но едноставно ете, така требало да биде. Победата на "Макфест" бидејки ми е прво големо признание, ја посветувам на мајка ми и татко ми зашто тие ми се најголемата поддршка, ни изјави Влатко во Штип. На коментарите дека е копија на Тоше одговори дека му е драго што го споредуваат со починатата мегаsвезда но и дека ниту сака ниту може да го имитира, туку едноставно е таков.
Влатко победи во дебитантската вечер, беше втор во втората полуфинална вечер и победи на финалето. За малку на "Макфест" ќе се повтореше дебитантската победа на Бојана. Таа пред неколку години победи на дебитантската и во полуфиналната вечер и на финалето.
На фестивалот беа доделени и стандардните стручни награди. Наградата за најдобра интерпретација и припадна на Здравка Мирчевска, пејачката на групата "Патници", за најдебитант е прогласен победникот, Влатко Лозановски, за најдобар текст е прогласен текстот на Огнен Неделковски за песната " Не прашувај зошто умирам", што ја отпеа Марјан Стојановски, наградата за најдобар аранжер ја доби Владимир Дојчиновски-Дојчин, додека наградата за сценски настап што ја доделува "Вест" им припадна на групата "Д.Н.К". За најслушана песна меѓу двата фестивала е прогласена песната "Некаде после 2", што лани ја испеја Елвир Меќиќ. Новинарската награда "Павле Георгиев" годинава ја доби екипата на "Антена 5" радио.
По прогласување на победниците од фестивалската сцена учесниците се преселија во ресторанот "Ваго", каде традиционално се одржа завршниот коктел. Влатко, "Некст тајм" и Влатко и Дани ја пресекоа победничката торта и победата ја прославија со шампањско.
|
