|
Кој вели дека на естрадата тече мед и млеко, греши. Иако можеби не толку колку ѕвездите во Холивуд, ама и нашиве естрадни уметници на своја кожа ја почувствувале темната страна на славата. Во борбата да го задржат местото на врвот, многу од нив се соочиле со трачеви. Иако постои изреката дека оној кој е најозборуван и најкритикуван мора да е многу успешен, сепак некои од споменатите ликови се дел од нашата листа не заради професионалноста, туку бурниот приватен живот.
Иако во последниот хит "Класика" вели: "Сите го сакаат Слаткар, затоа Марко нема девојка", дечкото без влакна на јазикот освен што го освои врвот на македонската хип-хоп сцена го освои и срцето на ексмисицата Сања Николиќ. За само четири месеци љубовната идила се најде во центарот на чаршиските муабети не толку поради фактот дека Сања е постара, туку затоа што заради него раскина со Дени, тапанарот од Браво Бенд. Приказните со раперот и Сања не завршија тука. Во нив се вмеша и бившиот, Јанез. Словенецот со кого раскина пред две години, а кој очигледно уште не ја преболел, наводно ја сретнал заљубената двојка во еден од скопските клубови и му удрил тупаница на раперот.
Доста се шушка и за пропаднатиот брак на Калиопи и актерот Васил Зафирчев. Според едни, иницијатор за разводот била Калиопи, а според други се сложиле дека понатаму веќе не можат заедно и дека треба да се разделат. Причината ја знаат само тие, а ние знаеме дека иако поп-дивата беше прилично постара од актерот бракот им важеше за еден од најстабилните на естрадата. Бракот со Васил и беше втор, претходно беше мажена со Ромео Грил со кого го има синот Пако.
Калиопи не е единствената пејачка која не остава во љубовни прашалници. Ако се вратиме години наназад ќе се сетиме и на распадот на две и полгодишната врска на Каролина и Гроздан. Иако крајот на летото 2003 значеше и крај за врската, Гроздан не се откажа и неговата решеност да ја врати саканата резултираше со билборди на кои пишуваше "Каролина те сакам, врати се". Тогаш се шушкаше дека причината за прекинот е неверството и на двајцата - наводната врска на пејачката на релација Скопје-Белград и аферата на Гроздан во времето додека таа беше на Евровизија. Набргу Каролина се појави во друштво на Михајло Ражнатовиќ. Врската брзо пропадна, а по кусото помирување со Гроздан следуваше нов дечко - Дино Балиќ. Откако му ја запеа "Крај" се фрли во прегратката на актуелниот Јован Пановски. Се надеваме дека овој пат е во вистинската прегратка.
Бурен љубовен живот има(ше) и поранешниот пливач Александар Маленко. Можеби не поставуваше болборди, ама ставаше прстени. Приказната за вистинската љубов со десет години постарата Сузана Турунџиева почна во 1999. Една година подоцна ја добија ќеркичката Лора. За жал, среќата не траеше долго, па откако пропадна овој, следуваше нов брак. Со актерката Јелена Жугиќ во книгата на венчаните се потпиша кон крајот на февруари 2003. Идилата во која го добија синот Ахил заврши со развод. Малку фалеше со свадба да заврши и врската со Фани. Откако гулапчињата се оладија Маленко стана руски зет. Со оглед на тоа дека веќе извесно време е на домашен терен по се изгледа дека точка е ставена и на оваа романса.
И за крај можеби најсвежата драма. Главните ликови овој пат се Александар Ружин и Антонија Шола. По шест месеци љубов врската наместо со најавениот брак се распадна. Причините за крајот - различни. Секој си ја тера водата на својата воденица и го плука другиот. Случувањата поврзани со Алекс и Шола се жив доказ дека линијата меѓу љубовта и омразата е тенка.
|
