|
Драган Даутовски предизвика голем интерес свирејќи на окарината стара 6.000 години
Концертот на „Даутовски квартет“ беше оценет како еден од најдобрите на Загрепскиот етно-фестивал
Македонскиот етно-квартет предводен од професор Драган Даутовски во петокот настапи на Загрепскиот етно-фестивал, а во рецензијата на интернет-порталот www.muzika.hr концертот е оценет како еден од најдобрите на фестивалот. Во извештајот се вели дека организаторите направиле одличен потег што го преместиле концертот во поголемата и поакустична сала на киното во Студентскиот центар, бидејќи имало место за сите 500 посетители. Во двочасовниот настап на „Драган Даутовски квартет“, најинтересен детаљ бил инструментот окарината стар 6.000 години, на кој свирел македонскиот професор по етнологија и музика, а веројатно тоа е една од причините за големиот интерес, сметаат од „Музика.хр“. Почетокот на концертот бил посветен на првиот албум „Патот на сонцето“ од 2001 година, што содржи песни од македонското поднебје во модерни аранжмани, но со користење традиционални акустични инструменти.
Според рецензијата, уште на почетокот на концертот вокалистката Александра Поповска се истакнала со своето речиси ангелско пеење и извонредната контрола на гласот. Публиката одлично ја прифатила и богато ја награди со аплауз, а Даутовски го видел тоа и дополнително ја истакнувал по секоја песна. Дел од квартетот на Даутовски е и неговиот син, на удиралки и на тапан, како и Бајса Арфиовска, на традиционалните инструменти тамбура и кавал, кои заедно со тамбурата на Драган го создаваат препознатливиот македонски традиционален звук.
По еден час од настапот, Даутовски ја претставил и окарината, инструментот стар 6.000 години, пронајден во околината на Велес, предмет за кој научниците долго не можеа да откријат за што служел. Виртуозот посочил дека инструментот со кој настапува е копија на оригиналниот инструмент што е сместен на сигурно, а кој припаѓа на групата флејти. Извел и импровизација на окарината, која со својот префинет звук ги вратила присутните во далечното минато, пренесува порталот. Кон крајот на концертот Даутовски ги извел нумерите од албумот „Разбој“, на кој е застапена само традиционална македонска музика во изворен облик, со тамбура, кавал и со гајда. Концертот завршил со еден бис, а музичарите уште двапати се вратија да се поклонат пред публиката за громогласниот аплауз. Рецензијата завршува со тоа дека музичарите биле одушевени од приемот на публиката, која уживала во настапот на македонската група и дека се надеваат на скорашна повторна средба.
|
