|
"Имам болест на белите дробови, веќе четири години примам терапија на клиника во Франција, но сеeуште добро се држам. Гласините дека имам рак и дека се борам за живот кои што се пласираа во јавноста уште пред неколку години ги демантирам со секој мој нов ден. Жив сум, сe уште настапувам на свадби и фестивали, а наскоро заминувам и на европска турнеја. Но, поради мојата болест на која што дури ниту името точно не и го знам бидејќи не сакам да мислам на неа, морам повеќе да се штедам и да внимавам на себе. Тоа сигурно го забележуваат и моите обожаватели, но сепак за себе можам да кажам дека јас дури и болен пејам подобро и со повеќе дух и емоции од повеќето мои млади колеги, - ни изјави фолк ѕвездата Гоце Арнаудов (51), еден од најенергичните пејачи на естрадата.
Фолк ѕвездата кој со сопругата и синот живее во Струмица, прв пат јавно проговори за болеста. Иако темпото на работа му е намален, вели дека има уште многу да и даде на публиката.
- Можеби недостасува дел од мојата голема харизма на која што свикна народот, но мојата голема љубов кон песната и пеењето од срце сигурно дека ја надополнуваат таа енергија која што морам да ја чувам поради болеста. Отсекогаш сум бил борец и не се предавам, се надевам дека моите обожаветели кои што се наоѓаат во слични животни ситуации ќе се угледаат на мене и ќе соберат сили за се што носи животот. Да беше вистина сето тоа што се збореше и коментираше за мене уште пред четири години јас одамна ќе бев мртов, но тука сум, и имам уште многу да и дадам на мојата верна публика, вели Гоце.
Арнаудов планира да му пее и на свадбата на својот пријател, министерот за транспорт и врски Миле Јанаќиевски,во јуни во хотелот "Холидеј Ин" во Скопје. Во кабинетот на министерот вработена е ќерка му Харита која со години живее во Скопје.
-Гоце веќе со години ме прашува кога ќе ми пее на свадба. Тој е мој стар пријател, па еве сега му се исполни желбата. Дефинитивно, тој ќе ни пее на свадб ата, а венчавката ќе биде во "Св. Јован Бигорски" , изјави за "Вест" пред десетина дена министерот за транспорт во информацијата дека се жени по 11-годишна врска.
Фолк ѕвездата на тринаесетти февруари заминува на едномесечна турнеја низ Европа, а веднаш по враќањето од турнејата во план му е уште една, во САД. Тој е еден од ретките фолк пејачи кој што може да се пофали дури со неколку турнеји годишно во странство и отсекогаш бил миленик на дијаспората и прикажуван како мајстор за незаборавни забави.
|
