|
Во поинаква атмосфера, која повеќе може да се нарече добра забава отколку класична промоција, Елвир Мекиќ и Слаѓана Делибашиќ го промовираа спотот за дуетската "5 минута". Се работи за хитовска денс нумера чиј ритам е сосема доволен за во спотот главните јунаци да ги покажат танчарските квалитети. Она што го забележаа бројните присутни во клубот "Би ту", каде што и се случи промоцијата, се движењата на гостинката од Србија која покажа дека жените и во средни години можат и тоа како добро да изгледаат.
Кадрите во записот се снимени под режисерската палка на Јован Јованов, кој е автор и на музиката и аранжманот, во казиното "Фламинго". Текстот е на Елвир, кој вели дека ова е всушност првиот во низата планирани ангажмани со кои ќе се обиде да се појави и на музичките пазари во соседството. Освен главните јунаци и моделите од Моделс ин, како редовен декор во спотовите на ексклузивците на План Б продукција и овојпат го има менаџерот Кристијан. По скопската, барем според најавите, би требало да следуваат промоции и низ градовите на екс ЈУ-републиките.
|
