|
Македонскиот интернационално реномиран пијанист Симон Трпчески уште еднаш потврди дека спаѓа во светската клавирска елита. Брилијантниот рецитал што го одржа во Лудвигсхафен, Германија, завчера ја воодушеви многубројната концертна публика, која ја исполни салата до последно место. Билетите за концертот, одржан под покровителство на хемискиот гигант БАСФ, кој веќе 20 години во овој германски град ги претставува најталентираните млади пијанисти од целиот свет, беа со месеци однапред распродадени. Заинтересираната и извонредно искусна публика, која со многу внимание и големи очекувања го следеше настанот, беше информирана дека Трпчески освоил низа награди на големи меѓународни натпревари, „спектакуларно дебитирал“ во Лондон, а потоа ги освоил концертните дворани во Европа, Австралија, Азија и во Америка. Организаторот го најави како пијанист со „магнетска сила“.
Таа „магнетска сила“ на Трпчески ја почувствува не само публиката, туку и критиката што напиша дека „Трпчески е многу повеќе од млад талент и го нарече „млад маестро“. Весниците пишуваат:“Македонецот е светска класа“. Или Трпчески се претстави со виртуозно-романтичен репертоар, од Фредерик Шопен, преку Клод Дебиси до Сергеј Прокофјев, во кој дојдоа до израз не само неговата феноменална техника туку и извонредната музикалност. Тој создава од една страна оркестрален тон, од друга најсуптилни пијана на речиси бестежинска состојба, екстреми поврзани со прекрасно нијансирани пасажи.
Неговата интерпретација на Бе-мол сонатата на Шопен (т.н. Посмртен марш соната) критиката ја спореди со легендарниот Артур Рубинштајн и додава дека „во светот нема пет пијанисти кои во крешендото и завршницата на сонатата може да се мерат со Трпчески“. По разиграноста и елегантната естетика кај Дебиси, следеше Прокофјев - за интерпретацијата Де-мол токатата критиката имаше само еден збор: спектакуларно! Трпчески го заокружи рециталот со Бе-дур сонатата (таканаречената Војна соната) на Прокофјев, во која „бас-акордите експлодираат како гранати, дискант-акордите се зариваат во месото, осамени високи тонови дават СОС сигнали. Но Симон Трпчески победува“. Тоа се зборови со кој весникот „Манхајмер морген“ го завршува својот коментар.
Предизвикан од силниот аплауз на воодушевената публика „младиот маестро“ трипати беше вратен на бис. Прв додаток беше „На Струга дуќан да имам“, преку кои публиката ги почувствува темпераментните македонски ритмови, топлина на нашето сонце и кристално бистрата вода на Охридското Езеро. Трпчески се збогува со една арабеска од Дебиси и валцер од Шопен. Со рециталот во Лудвигсхафен, каде што публиката веќе две децении има средба со најголемите млади пијанисти, каде што концерт одржа и кинескиот пијанист Ланг Ланг, Трпчески покажа дека една мала земја има голем талент. Неговиот рецитал беше повеќе од концерт - тоа беше празник.
|
